«Էրեբունի» բժշկական կենտրոն

Ռևմատոլոգիական հիվանդությունների առավել հաճախ հանդիպող ախտանշաններն են հոդերում և մկաններում հանկարծակի կամ աստիճանաբար ի հայտ եկող ցավերը, հոդերի արտահայտված այտուցվածությունը, հոդերում շարժումների կարկամությունը, հոդերի շրջանում մաշկի ջերմության բարձրացումը, մարմնի ջերմության բարձրացումը:

Ռևմատոլոգիայում ամենակարևոր պայմանը վաղ ախտորոշումն է, ինչը հնարավորություն է տալիս պահպանել հոդերի և ներքին օրգանների ֆունկցիաները և զգալի բարելավել հիվանդների կյանքի որակը: Այդ պատճառով անհրաժեշտ է մասնագետին դիմել աժխտանշանների ի հայտ գալուց անմիջապես հետո: Ռևմատոլոգիական որոշ հիվանդություններ լիովին բուժել հնարավոր չէ: Սակայն այսօր գոյություն ունեն բուժման եղանակներ, որոնք թույլ են տալիս դանդաղեցնել հոդերում, հարհոդային հյուսվածքներում և ներքին օրգաններում հաշմանդամության բերող փոփոխությունների զարգացումը և բարելավել հիվանդների կյանքի որակը:

«Էրեբունի» ԲԿ ռևմատոլոգիական բաժանմունքում իրականացվում է հենաշարժիչ համակարգի բորբոքային և դեստրուկտիվ ախտահարումներով հիվանդների (ոսկրերի, հոդերի և մկանների ախտահարմամբ ուղեկցվող), շարակցական հյուսվածքի այլ հիվանդություններով, համակարգային վասկուլիտներով ու այլ ախտաբանություններով հիվանդների ախտորոշում և բուժում:

Շարակցական հյուսվածքի տարածուն հիվանդություններ.

• համակարգային կարմիր գայլախտ,
• սկլերոդերմիա,
• դերմատոմիոզիտ,
• ռևմատիզմ,
• ռևմատոիդ արթրիտ:

Համակարգային վասկուլիտներ.

• հանգուցավոր պերիարտերիիտ,
• միկրոսկոպիկ պոլիանգիիտ,
• հեմոռագիկ վասկուլիտ,
• Չարգ-Ստրոսի համախտանիշ,
• Տակայասուի հիվանդություն:

Տարբեր ծագման արթրիտներ.

• պոդագրա և այլ միկրոբյուրեղային արթրիտներ,
• Բեխտերևի հիվանդություն (անկիլոզացնող սպոնդիլոարթրիտ),
• դեֆորմացնող օստեոարթրոզ,
• Բեխչետի հիվանդություն:

Յուրաքանչյուր տարի ռևմատոլոգիայի բաժանմունք է ընդունվում ավելի քան 600 հիվանդ: Իրականացվում է համալիր ախտորոշում ցուցաբերվում է բազմամասնագիտական խորհրդատվություն (օրթոպեդներ, վնասվածքաբաններ, սրտաբաններ, նյարդաբաններ, նյարդավիրաբույժներ, իմունաբաններ և այլն): Հիվանդների բուժումն իրականացվում է միջազգային չափանիշներին համապատասխան՝ ռևմատոլոգիայի բնագավառում նորագույն և առավել արդյունավետ մեթոդաբանության կիրառմամբ:

Բաժանմունքում գործում է ինչխպես ամբուլատոր, այնպես էլ ստացիոնար ծառայություն, հիվանդների բուժումը կազմակերպվում է նաև ցերեկային ստացիոնարում:

Ռևմատոլոգիայի բաժանմունքը ԵրՊԲՀ հետդիպլոմային ուսուցման «Նեղ թերապևտիկ մասնագիտություններ» ամբիոնի հիմնական կլինիկական բազաներից է, որտեղ վերապատրաստվում են ԵրՊԲՀ մագիստրատուրայի ուսանողները (ամբիոնի դոցենտ, բ.գ.թ. Ա. Հարոյան):

Ռևմատոլոգիայի բաժանմունքի աշխատակիցներն իրականացնում են ակտիվ գիտական գործունեություն՝ մասնակցելով և զեկույցներ ներկայացնելով միջազգային մասնագիտական գիտաժողովներին: Նրանցից շատերը վերապատրաստվել են արտերկրի առաջավոր կլինիկաներում: