«Էրեբունի» բժշկական կենտրոն

Առիթմոլոգիան կլինիկական սրտաբանությունն ամենաբարդ բաժիններից է, ինչը բացատրվում է առիթմիաների բազմազանությամբ, ախտորոշման և բուժման դժվարությամբ, ինչպես նաև այնպիսի վտանգավոր բարդությունների առաջացման հավանականությամբ, ինչպիսիք են թրոմբոէմբոլիան, սրտամկանի ինֆարկտը, ինսուլտը, սրտային անբավարարությունը և այլն:

Հանկարծակի առաջացած առիթմիաները հաճախ պահանջում են անհետաձգելի բուժական միջոցառումներ՝ սրտի կանոնավոր ռիթմի վերականգնման և նրա պահպանման նպատակով: Բուժման արդյունավետության կարևոր գործոն է հիվանդի բժշկին ժամանակին դիմելը: Առիթմիաները կարող են երկար ժամանակ չարտահայտվել, և մինչև հետազոտությամբ պատահաբար հայտնաբերվելը, հիվանդը հնարավոր է՝ չիմանա դրանց առկայության մասին:

Հաճախ առիթմիաները կարող են արտահայտվել հետևյալ ախտանշաններով

• սրտի աշխատանքի ընդհատման զգացում, ուժեղ սրտխփոց, սրտի «թրթռոց»
• սրտի աշխատանքի չափազանց արագացում կամ դանդաղում
• գլխապտույտ
• հևոց
• կրծքավանդակում ճնշող բնույթի ցավ
• ոտքերի տակ հողի «կորստի» զգացում
• սրտխառնոց և/կամ փսխում (հատկապես նորմալ ռիթմից առիթմիայի անցման կամ, ընդհակառակն, առիթմիայից նորմալ ռիթմի վերականգման ժամանակ)
• գիտակցության կորուստ

Առիթմիաների արտահայտման այսպիսի բազմազանությունը միշտ չէ, որ վկայում է ռիթմի խանգարման բարդության մասին: Սրտի ռիթմի աննշան խանգարումներով հիվանդները կարող են գիտակցությունը կորցնել, իսկ կյանքին, իրավամբ, վտանգ սպառնացող առիթմիայով հիվանդները նույնիսկ որևէ գանգատ չներկայացնեն: Ամեն ինչ կարող է շատ անհատական լինել: Բոլոր դեպքերում, առիթմիան ինքնուրույն բուժել ոչ մի դեպքում չի կարելի: Առիթմիան պետք է բուժի բժիշկը՝ հատուկ հետազոտություն անցնելուց և առիթմիան ախտորոշելուց հետո, հաշվի առնելով դրա առաջացման գործոնները:

«Էրեբունի» ԲԿ առիթմոլոգիական բաժանմունքում իրականացվում են սրտանոթային համակարգի միջամտական և ոչ միջամտական էլեկտրաֆիզիոլոգիական հետազոտություններ, առիթմոլոգիային և կարդիոստիմուլյացիային վերաբերող հարցերով խորհրդատվություն, կատարվում են սրտի ռիթմի խանգարման դեղորայքային և միջամտական, ներանոթային (կորոնար զարկերակների անգիոպլաստիկա, առիթմոգեն օջախների ռադիոալիքային աբլացիա, էլեկտրակարդիոստիմուլյացիայի տարբեր մեթոդներ, ռեսինխրոնիզացիոն թերապիա) և վիրահատական շտկումներ՝ միջազգային չափանիշներին և ուղեցույցներին համապատասխան:

Բաժանմունքը հագեցած է ամենաժամանակակից սարքավորումներով, այդ թվում՝ հիվանդների վիճակին մշտադիտարկող մոնիտոր համակարգերով, դեֆիբրիլյատորներով,էլեկտրասրագրության սարքերով: Առկա է առիթմիաների միջամտական էլեկտրոֆիզիոլոգիական ախտորոշման և միջամտական բուժման համար անհրաժեշտ բժշկական սարքավորումները:

Բաժանմունքի գործունեության հիմնական ուղղությունը բարդ առիթմիաների, սրտի ռիթմի խանգարմամբ բարդացած սրտային պաթոլոգիաների (սրտի իշեմիկ հիվանդություն, բնածին և ձեռքբերովի արատներ) բուժումն է:

Բաժանմունքում աշխատում են առաջատար բժիշկ-առիթմոլոգներ: Յուրաքանչյուր տարի բաժանմունքում բուժվում է 2000 հիվանդ, որից 1400-ը՝ ամբուլատոր: Առիթմոլոգիական բաժանմունքի բժիշկներն ակտիվորեն համագործակցում են Եվրոպայի, Ռուսաստանի և ԱՄՆ առաջատար կլինիկաների մասնագետների հետ: