Հայտնի ռուսաստանահայ վիրաբույժ, Մոսկվայի Ա. Բակուլեւի անվան սրտանոթային վիրաբուժության գիտական կենտրոնի Սրտանոթային հիվանդությունների հետազոտման եւ բուժման ռետգենավիրաբուժության մեթոդների բաժանմունքի վարիչ, պրոֆեսոր Բագրատ Ալեքյանը, այսօր՝ հոկտեմբերի 25-ին, «Էրեբունի» բժշկական կենտրոնում, լրագրողների ներկայությամբ, էնդովասկուլյար ստենտավորման վիրահատություն է անցկացրել: Նախքան վիրահատությունը նա լրագրողների հետ զրույցում նշել է, որ հիվանդը սրտի իշեմիկ հիվանդություն ունի. երեք անոթներից մեկը լրիվ փակ է, երկրորդը փակ է 90 տոկոսով (ֆոտոռեպորտաժ):Էնդովասկուլյար վիրաբուժության մեջ բոլոր միջամտությունները կատարվում են առանց կտրվածք անելու. Ընդամենը կատետր տեխնոլոգիաներով մի փոքր անցք է բացվում: Այդ ճանապարհով հնարավոր է բուժել սրտամկանի ինֆարկտը, ինսուլտը, ինչպես նաեւ սրտի արատ ունեցող հիվանդներին:Վիրահատության դեպքերի մեծ մասում նարկոզի անհրաժեշտություն չի լինում, միայն տեղային ցավազրկում է իրականացվում: Դա թույլ է տալիս վիրահատել անգամ ծանր ուղեկցող հիվանդություն ունեցող մարդկանց, որոնք արգելված է ավանդական վիրահատական միջամտությունը: Այս դեպքում վիրահատական ռիսկը եւ վերականգնման ժամանակն էականորեն նվազում են:Նշենք, որ «Էրեբունի» բժշկական կենտրոնում անգիոգրաֆիկ ծառայությունը հիմնադրվել է 2003-ին, այն կրում է ակադեմիկոս Բագրատ Ալեքյանի անունը: Բաժանմունքը հագեցած է գերմանական վերջին սերնդի Siemens Artis Biplane անգիոգրաֆով, որը Հայաստանում եզակի է: Սարքի տեխնիկական հնարավորությունները թույլ են տալիս կատարել ներանոթային միջամտություններ՝ անգիոգրաֆիա, ստենտավորում, ոչ միայն սրտի, այլեւ մնացած բոլոր օրգանների անոթների:Լրագրողները հնարավորություն են ունեցել վիրահատությանը հետեւել մեծ ապակու հետեւից:
Սկզբնաղբյուրը՝ news.am
