«Էրեբունի» բժշկական կենտրոն

Նորություններ

32-ամյա Գոհարը եռյակին սպասել էր յոթ տարի. բացառիկ նկարահանում ծննդատնից (տեսագրություն)

32-ամյա Գոհարը եռյակին սպասել էր յոթ տարի. բացառիկ նկարահանում ծննդատնից (տեսագրություն)

7 տարի երեխա չունենալուց հետո նոյեմբերի 29-ին Վանաձորի բնակիչ Գոհար Գոգինյանը եռյակ է ունեցել «Էրեբունի» բժշկական կենտրոնում։ 32-ամյա Գոհարը NEWS.am Medicine-ին պատմեց, որ անակնկալ չէր եռյակի ծնունդը։

«Կոնսուլտացիայի ժամանակ իմացա, որ եռյակ է լինելու։ Սկզբում մի տեսակ էր. ուղղակի անսովոր է 7 տարի երեխա չունենալուց հետո եռյակ ունենալը»,- NEWS.am Medicine-ին ասաց Գոհարը։

Առաջինը լույս աշխարհ է եկել Քրիստինեն՝ 1 կգ 580 գ քաշով, այնուհետև Գարիկն ու Գևորգը՝ համապատասխանաբար 1 կգ 650 գրամ և 1 կգ 250 գրամ։ Երեխաների անունները որոշել են ծնողները։ Հայրը` Արմեն Շարխյանն արդեն մի քանի օր հիվանդանոցից տուն չի գնում. հիվանդանոցում բոլորը նրան ճանաչում են. եռյակի հայրն է։

Չնայած ծանր հղիությանն ու կեսարյան հատմանը, Գոհարն իրեն լավ է զգում. օրվա մեծ մասն ամուսնու հետ անցկացնում է նորածինների ինտենսիվ թերապիայի բաժանմունքում, որտեղ այս պահին գտնվում են երեխաները։

Նորածնային բաժանմունքի վարիչ Լարիսա Երիցյանը մեզ հետ զրույցում հայտնեց, որ երեխաների վիճակը միջին ծանրության է. «Կարևորը թթվածնային ապարատով չեն։ Երեքն էլ լավ են, ուղղակի դեռ հատուկ զոնդով ենք կերակրում։ Հենց մայրը կարողացավ ինքնուրույն կերակրել երեխաներին, նրանց կտեղափոխենք հիվանդասենյակ»։

Հղիության ամբողջ ընթացքին հետևած և ծնունդն ընդունած մանկաբարձ-գինեկոլոգ Դավիթ Աբովյանի խոսքով` երեխաներն ու մայրը ոչ մի առողջական խնդիր չունեն, չնայած եռյակի դեպքում առողջական խնդիրների ռիսկը մեծանում է։

 «31-րդ շաբաթի 3-րդ օրն ենք կեսարյան հատում արել. մոր վիճակն արդեն վատանում էր, ստիպված էինք։ Ճնշման հետ խնդիրներ ուներ, սպիտակուցն էր շատացել արյան մեջ ու որոշեցինք վիրահատել։ Հիմա մոր վիճակն ընտիր է, եթե եռյակ չլիներ, վաղուց էինք դուրս գրել»,- նշեց բժիշկը։

Գոհարին և Արմենին երեխաներին խնամելու հարցում օգնելու են տատիկներն ու հարազատները. «Պետք լինի, ես էլ կպահեմ, ինչ ա եղել որ»,- ծիծաղելով ասաց հայրը։

 

 

Սկզբնաղբյուրը՝ news.am

05.12.2013
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Դեպի վեր