Քիթ-կոկորդ-ականջի հիվանդությունների բաժանմունք

Էրեբունի բժշկական կենտրոնի քիթ-կոկորդ-ականջաբանական (ՔԿԱ) բաժանմունքը հիմնադրվել է ՀՀ առողջապահության նախարարության (նախարար` պրոֆեսոր Արա Բաբլոյան), UMAF Paris նախագահ` Գ. Աբգարյանի, պրոֆեսոր Հ.Մ. Քուշկյանի, պրոֆեսոր Եղիա-Նովել Գարաբեդյանի (Փարիզի Տրուսսո և Նեկեր հիվանդանոցների ՔԿԱ կլինիկաների ղեկավար) նախաձեռնությամբ և SOS-Armenia հիմնադրամի աջակցությամբ (նախագահ` Շառլ Ազնավուր):

Ժամանակակից տեխնիկան, որով հագեցած է բաժանմունքը, ախտորոշման և բուժման նորագույն մեթոդները և կլինիկայի բժիշկների գիտելիքների բազայի շարունակական ընդլայնումը հնարավորություն են տալիս բուժման մեջ ընդգրկել ՔԿԱ հիվանդությունների ամբողջ սպեկտրը:

Մեծ ուշադրություն է դարձվում ՔԿԱ ախտաբանությունների համալիր ֆունկցիոնալ ախտորոշմանը: Ժամանակին և ճշգրիտ ախտորոշման շնորհիվ հնարավոր է լինում խուսափել հետվիրահատական բարդություններից, չհիմնավորված վիրահատական միջամտություններից:

ՔԿԱ բաժանմունքում կատարվում են պլանային վիրաբուժական միջամտություններ քթի խոռոչի, քթի հարակից խոռոչների, ըմպանի և կոկորդի ախտաբանությամբ հիվանդների համար: Վիրահատական բուժումն իրականացվում է ժամանակակից, հաճախ՝ քիչ ինվազիվ եղանակներով:

ՔԿԱ հիվանդներին շուրջօրյա ռեժիմով ցուցաբերվում է անհետաձգելի վիրաբուժական օգնություն:

Քթի, քթի հարակից խոռոչների, ըմպանի և կոկորդի հիվանդությունների ժամանակ կատարվող էնդոսկոպիկ միջամտությունները, ականջի վրա իրականացվող լսողության վերականգնման միկրովիրահատական և սանացիոն վիրահատությունները, ՔԿԱ օրգաններում և պարանոցի շրջանում բորբոքային գործընթացների դեպքում սանացիոն վիրահատությունները, դեմքի վնասվածքների ժամանակ ֆունկցիոնալ վիրահատությունները, վերին շնչական ուղիների շրջանում ուռուցքային հիվանդությունների վիրահատական բուժումը և ՔԿԱ օրգանների թարախային հիվանդությունների բուժումն իրականացվում են նորագույն բժշկական տեխնոլոգիաներով՝ վիրահատության ընթացքում ապահովելով օրգանների նվազագույն վնասումը և հիվանդների արագ հետվիրահատական վերականգնումը:

Վերջին տարիների ընթացքում Էրեբունի ԲԿ-ի ՔԿԱ կլինիկան արդյունավետորեն շարունակում է միջազգային համագործակցությունը Եվրոպայի, Ասիայի և Ամերիկայի առաջատար կլինիկաների հետ: Կլինիկայի հիմնադիր պրոֆեսոր Ե-Ն. Գարաբեդյանը ստեղծման օրվանից առ այսօր նպաստում է Հայաստանում այդ ոլորտում հետազոտության, ախտորոշման և բուժման ժամանակակից մի շարք մեթոդների ներդրմանը: Հայ մասնագետները պարբերաբար մասնագիտացում են անցնում նրա կողմից ղեկավարվող կլինիկաներում (Փարիզի Տրուսսո և Նեկեր հիվանդանոցների ՔԿԱ կլինիկաներում):

2004 թվականից, UCLA համալսարանի հետ համագործակցության շնորհիվ, առաջատար օտովիրաբույժ Ակիրա Իշիյամայի գլխավորությամբ, ինչպես նաև Սալբի Ագարակյանի (Salpy Agarakian) գլխավորած AIMF հիմնադրամի մասնակցությամբ, առաջին անգամ Հայաստանում ներդրվել է կոխլեար ներպատվաստման ծրագիրը: Մինչև օրս ՔԿԱ բաժանմունքում 96 հիվանդի մոտ կատարվել է կոխլեար իմպլանտացիա, որոնցից 17-ը մեծահասակներ են, մյուսները՝ երեխաներ: Վիրահատված երեխաները խոսում են, դպրոց հաճախում: Վիրահատության արդյունքները համապատասխանում են միջազգային ցուցանիշներին:

Իրականացվում է նորածինների աուդիոսքրինինգ՝ 2008 թ. ՀՀ Առողջապահության նախարարի կողմից (նախարար՝ պրոֆ Հ.Մ. Քուշկյան) հաստատված նորածինների աուդիոլոգիական սքրինինգի պետական ծրագրի համաձայն. Երևանի ծննդատներում կյանքի առաջին 48-72 ժամվա ընթացքում երեխան հետազոտվում է սքրինինգային սարքի օգնությամբ: Լսողության նորմայից շեղումների դեպքում երեխան ընդգրկվում է դիսպանսեր հսկողության ծրագրում և հետազոտվում կյանքի 3-րդ և 6-րդ ամիսներին: Ախտորոշման ձևակերպումից հետո՝ 6 ամիսների ընթացքում, փոքրիկի հետ սկսվում են վերականգնողական աշխատանքներ:

Հետագայում այս ծրագրերի զարգացմանը շատ հարցերում նպաստել են պրոֆեսոր Ե-Ն. Գարաբեդյանի և պրոֆեսոր Գ.Ա. Տավարտկիլաձեի կողմից գլխավորած կլինիկաների և բժշկական կենտրոնների աշխատակիցները: Էրեբունի ԲԿ-ի ՔԿԱ բաժանմունքի մասնագետները պարբերաբար մասնագիտական կուրսեր («կոխլեար իմպլանտացիայի և նորածինների աուդիոլոգիական սքրինինգի հրատապ հարցերը») են անցնում ՌԴ Դաշնային բժշկակենսաբանական գործակալության աուդիոլոգիայի և լսողական սարքերի տեղադրման Ռուսական գիտագործնական կենտրոնում՝ պրոֆեսոր Գ.Ա. Տավարտկիլաձեի ղեկավարությամբ: 2012թ. պրոֆեսորներ Ե-Ն. Գարաբեդյանը և Գ.Ա. Տավարտկիլաձեն ընտրվել են ՀՀ Գիտությունների ազգային ակադեմիայի պատվավոր դոկտոր: Պրոֆեսոր Գ.Ա. Տավարտկիլաձեի նախաձեռնությամբ Հայկական կոխլեար կենտրոնին նվիրաբերվեց կոխլեար իմպլանտացիա իրականացնելու համար ժամանակակից հագեցած հավաքածու, ինչպես նաև ՀՀ-ում բացվեց ՔԿԱ, գլխի և պարանոցի վիրաբուժության միջազգային ակադեմիայի մասնաճյուղը:

Ներդրված է վիրահատական միջամտությունների լայն սպեկտր, որը հնարավորություն է տալիս բուժել լսողական և վեստիբուլյար անալիզատորի գրեթե բոլոր ախտաբանությունները, այդ թվում՝ արտաքին և միջին ականջի զարգացման բնածին խանգարումները, թմբկախոռոչի բարորակ անոթային ուռուցքները: Մանրամասն նախավիրահատական նախապատրաստումը և բարձր որակավորված ցավազրկումը թույլ են տալիս նվազագույնի հասցնել հետվիրահատական բարդությունների թիվը:

Հագեցած վիրահատարանում, որտեղ կան գերժամանակակից լազերային և էնդոսկոպիկ սարքավորումներ, բաժանմունքի մասնագետները՝ կիրառելով նորարարական վիրաբուժական տեխնոլոգիաներ, կատարում են հետևյալ միջամտությունները.

• քթի հարակից խոռոչների էնդոսկոպիկ վիրահատություններ (FESS՝ էնդոսկոպիկ ֆունկցիոնալ սինուսավիրաբուժություն),
• կոկորդի և քթի խոռոչի պոլիպների հեռացում,
• կոնխոտոմիա կամ տուրբինէկտոմիա (քթի խեցիների հեռացում),
• ստորին քթային խեցիների էնդոսկոպիկ վազոտոմիա,
• քթային խեցիների ռադիոալիքային ռեդուկցիա և էլեկտրակոագուլյացիա,
• քթի միջնապատի թեքվածության շտկում,
• ադենոիդէկտոմիա (ադենոիդ վեգետացիաների հեռացում),
• տոնզիլէկտոմիա (քմային նշիկների հեռացում),
• ձայնալարերի պլաստիկա,
• «գայլի երախ», «նապաստակի շրթունք» բնածին արատների վերացում,
• թմբկախոռոչի շունտավորում,
• կոխլեար իմպլանտացիա (լսողությունը լավացնող հատուկ սարքերի պատվաստում խխունջի մեջ),
• թմբկաթաղանթի ռեկոնստրուկցիա (միրինգոպլաստիկա),
• տիմպանոպլաստիկա՝ միկրովիրաբուժական պրոթեզների կիրառմամբ,
• մաստոիդէկտոմիա,
• վիրահատություններ վահանաձև գեղձի ախտաբանությունների ժամանակ (այդ թվում՝ ուռուցքաբանական),
• պարաթիրեոիդէկտոմիա (հարվահանաձև գեղձերի հեռացում),
• սիալէկտոմիա,
• պարանոցային լիմֆոդիսսեկցիա և այլն:

Բաժանմունքի բժիշկները խորհրդատվական օգնություն են ցուցաբերում համաբուժարանից ուղեգրված դժվար ախտորոշվող հիվանդներին, ինչպես նաև շարունակում են ՔԿԱ-ստացիոնարից դուրս գրված հիվանդների հսկողությունը:

ՔԿԱ բաժանմունքի աշխատանքի օպտիմալացման նպատակով, բարդ վիրահատական միջամտությունների իրականացման ժամանակ Էրեբունի ԲԿ-ի բազմապրոֆիլության շնորհիվ հնարավոր է վիրաբուժական թիմի մեջ ընդգրկել ոչ միայն քիթ-կոկորդ-ականջաբանների, այլև ուռուցքաբանների, պլաստիկ վիրաբույժների, նյարդավիրաբույժների և այլ մասնագետների:

Էրեբունի ԲԿ-ի ՔԿԱ կլինիկան Երևանի պետական բժշկական համալսարանի ՔԿԱ հիվանդությունների ամբիոնի հիմնական բազան է: Այստեղ կազմակերպվում է ոչ միայն բակալավրիատի և մագիստրատուրայի ուսումնական գործընթացը, այլ նաև ՀՀ և այլ երկրների մասնագետների հետդիպլոմային ուսուցումը, մասնագիտացումը և գիտահետազոտական գործունեությունը:

Բաժանմունքի բուժանձնակազմը մշտապես կատարելագործվում է Ֆրանսիայի, Գերմանիայի, Ռուսաստանի, ԱՄՆ-ի լավագույն կլինիկաներում, համատեղ իրականացնում մի շարք գիտահետազոտական ծրագրեր: